Chti qui dit cho

Chti qui dit cho… Chti qui dit…

 

Chti qui dit qu’ichi i fro jamoais coeud

Qu’o vivons chés deux pieds din l’ieu

Qu’nos moaisons tienn’t aveuc del beue

Qu’o n’dvisons qu’d’ech temps pi d’el pleuve

 

Il o point tort mais i n’feut mie

Qu’i resse lo conme o, ébeubi

Seulmint, i n’comprind point el mitan d’ech quart

A ch’rêve picard!

Chti qui dit cho… Chti qui dit…

 

Chti qui dit qu’nos gins n’savn’t point quoè foaire

Que rbéyer un un moénieu cha zzés foait braire

Mitan jotcheus o bin au cmin d’fer

Tertous herlands pi nez in l’air.

 

Refrain

 

Chti qui dit qu’à no perlage, oz y comprind rein

Qu’o cantons pour nos feumes pi nos voésins

In artitchulant conme des tchiens

Pi qu’ch’est point pu clair éq du martien.

 

Refrain

 

Chti qui dit qu’no tchulture ch’est bin foéreux !

Qu’nos cabotans foait’t peur à chés morveux

Sur nos jux in bos, pour rire à picheu

I veut miu éte un molé seu !

 

Refrain

 

Ben a s’voét qu’i n’est point d’ichi

I n’connoait mie el Picardie

Il est un molé malaprins

Ben i s’in vo s’in morde ses dints !